"ഒരു ഭരതൻ ടച്ച് " --- പിന്നെ കുറേ ചോദ്യങ്ങളും .
സ്കൂളിൽ പഠിക്കുന്ന കാലഘട്ടത്തിലെ ഒരു ദിവസം . ഞാനുൾപ്പെടുന്ന ഒരു സംഘം കുട്ടികൾ ഒരു സിനിമ പോസ്റ്ററിന്റെ മുന്നിൽ നിൽക്കുകയാണ് . ഭരതൻ സംവിധാനം ചെയ്ത ഏതോ ഒരു ചിത്രമാണ് .
( "അമരം"- മമ്മൂട്ടി മുരളി അശോകൻ മാതു ).
അന്നേ സിനിമാ ചർച്ചകൾ ഞങ്ങൾ കൂട്ടുകാർക്കു ഉണ്ടായിരുന്നു . ചർച്ച എന്നാൽ ഗൗരവപൂർണമായ ഒന്നും ആയിരുന്നില്ല . സിനിമാകഥകൾ പറയുക, അതിലെ ഗംഭീരമായ രംഗങ്ങളെകുറിച്ചുപറയുക,അതിൽ കൂടുതലൊന്നും ഉണ്ടായിരുന്നില്ല. അന്ന് ആ പോസ്റ്റർ എന്ത് കൗതുകമാണ് ഉണ്ടാക്കിയതെന്നു പോലും എനിക്ക് ഇപ്പോൾ ഓർമയില്ല. പക്ഷെ ആ പോസ്റ്ററിൽ എഴുതിയിരിക്കുന്ന ഒരു വാചകം " ഒരു ഭരതൻ ടച്ച് " അത് ഞാൻ ശ്രദ്ധിച്ചിരുന്നു .
.....ഭരതൻ ടച്ചോ ?
....പോസ്റ്ററിൽ നിന്നും കണ്ണെടുക്കാതെ ഉത്തരം വന്നു. " ടച്ച് എന്നാൽ തൊടുക , ഭരതനാണല്ലോ സംവിധായകൻ അപ്പോൾ അയാൾ ഈ സിനിമയിൽ അയാൾ എവിടെയോ തൊട്ടു .
( നിഷ്കളങ്കമായ ഉത്തരം )
....പോടാ, അതെന്തൊന്നു തൊടലാ ?
ഞങ്ങൾ കൂട്ടുകാർ ഓരോന്നു അങ്ങോട്ടും ഇങ്ങോട്ടും ചോദ്യങ്ങൾ ചോദിച്ചും ഉത്തരങ്ങൾ പറഞ്ഞും നടന്നകന്നു.
" ഒരു ഭരതൻ ടച്ച് " എന്ന വാചകം പിന്നീട് കണ്ടത് ഒരു മാഗസിനിലോ മറ്റോ ഭരതന്റെ മകൻ സിദ്ധാർത്ഥിന്റെ ഫോട്ടോയുടെ താഴത്ത് "ഒരു ഭരതൻ ടച്ച് " എന്ന് കളിയാക്കി കണ്ടു. അത് അവിടെ അവസാനിച്ചു . ആ വാചകവും അതിനെക്കുറിച്ചുള്ള ചിന്തകളും .
വർഷങ്ങൾക്ക് ശേഷം .......
മീൻകറി ഉണ്ടാക്കുന്നത് അമ്മയുടെ കൈയിൽ നിന്ന് പഠിക്കുകയായിരുന്നു ഞാൻ .
അമ്മ പറഞ്ഞു തന്നു.
" മീൻ കഴുകി വൃത്തിയാക്കി മുറിച്ച് പാത്രത്തിലാക്കുക .എന്നിട്ടു കുറച്ച് സാധാരണ പുളിയോ , കുടം പുളിയോ ഒരു ചെറിയ പാത്രത്തിൽ കുറച്ച് വെള്ളത്തോടപ്പം ഇട്ടു വയ്ക്കുക. വെള്ളം നേരിയ ചൂടുണ്ടായാൽ നല്ലത്. എന്നിട്ടു കുറച്ച് മുളകുപൊടി , മല്ലിപൊടി , മഞ്ഞൾ പൊടി ഇവ കഠായിലിട്ടു ചൂടാക്കുക. ചൂടാക്കിയില്ലെങ്കിൽ ആ മസാല പച്ച ചുവക്കും . ചൂടാക്കിയ മസാല ഒരു മിക്സിയുടെ ജാറിലിടുക . എന്നിട്ടു കഠായിൽ കുറച്ച് വെളിച്ചെണ്ണ ഒഴിച്ച് രണ്ടു ടീസ്പൂൺ ഒലുവ ഇട്ടു ചൂടാക്കുക . അത് ബ്രൗൺ കളറായി വരുമ്പോൾ അരിഞ്ഞു വച്ചിരിക്കുന്ന ഉള്ളി അതിലിടുക .ചെറിയ ഉള്ളിയാണ് നമ്മൾ മലയാളികൾ ഉപയോഗിക്കുന്നത് . ചെറിയ ഉള്ളിയുടെ സ്വാദ് ഒന്ന് വേറെ തന്നെയാണ് . ഉള്ളി ചുവക്കുമ്പോൾ അതെല്ലാമെടുത്ത് ആ മിക്സിയുടെ ജാറിൽ മസാലയോടപ്പം ഇടുക . എന്നിട്ടു കുറച്ച് തേങ്ങാ തിരുകി ആ ജാറിലിടുക . തേങ്ങ കൂടിപ്പോകരുതു മീൻകറി മന്ദനാകും. എന്നിട്ടു ഇതെല്ലാം മിക്സിയിലിട്ട് ഒന്നരക്കുക . മഷി പോലെ അരയരുത്. ആ അരച്ചകൂട്ട് അരിഞ്ഞു വച്ചിരിക്കുന്ന മീനിൽ മിക്സ് ചെയ്യുക . എന്നിട്ടു പുളി വെള്ളം ഒഴിക്കുക . അപ്പോൾ അതിലൊഴിക്കേണ്ട വെള്ളത്തിനെപ്പറ്റി ഒരു ധാരണ വേണം . വെള്ളം ധാരാളമായാൽ അത് വറ്റി വരുമ്പോഴേക്കും പാവപ്പെട്ട മീൻ വെന്തു ഒരു പരുവുമാകും . കൂടാതെ മീൻകൂട്ട് ( മീൻ കറി ) എത്ര വേണമെന്നതും പ്രധാനമാണ് .
അമ്മ ഒന്ന് നിർത്തി .
പിന്നെ മസാലയുടെ അളവ് , തേങ്ങയുടെ അളവ് ഒക്കെ അനുഭവത്തിൽ നിന്ന് കിട്ടേണ്ടതാണ് . മീനിന്റെ Quanty, മീനിന്റെ സ്വഭാവം ( വ്യത്യസ്തമായ മീനുകൾ)
നോക്കിയാണ് മസാലയുടെ അളവുകൾ , പാകം ഒക്കെ തീരുമാനിക്കേണ്ടത് . അളവുകളും പാകവും മാറുമ്പോൾ ടേസ്റ്റ് മാറും. പിന്നെ മറ്റൊന്ന്, മീൻ തിളക്കുമ്പോൾ അത് പാകമായി എടുക്കുന്നതിനു മുൻപ് കുറച്ച് വെളിച്ചെണ്ണ ഒഴിക്കണം . ചിലർ ഒഴിക്കില്ല . പക്ഷെ അതൊരു പ്രത്യകതയാണ് . അതൊക്കെ നിനക്ക് താനെ തോന്നണം . അങ്ങനെ നിന്റെ "ടച്ച്" ആ മീൻകറിക്കു ഉണ്ടാകും .
പെട്ടന്ന് എന്റെ മനസ്സിൽ ഒരു ഫ്ലാഷ്ബാക്ക് .......
@കുട്ടികാലം @ സ്കൂൾ വിട്ട ഞങ്ങൾ കൂട്ടുകാർ @ ഒരു സിനിമാ പോസ്റ്ററിന്റെ മുന്നിൽ @അതിലെ വാചകം @ "ഒരു ഭരതൻ ടച്ച് ".
സത്യത്തിൽ അമ്മ പറയുന്ന ടച്ചിനും ഭരതൻ ടച്ചിനും ഒരു
ബന്ധമില്ലെ ? അത് ഈ മീൻകറി ഉണ്ടാക്കിയത് പോലെയല്ലെ ?. മീൻകറിയുടെ ചേരുവുകൾ ചേർക്കുമ്പോൾ അതിന്റെ അന്തിമ റിസൾട്ടിനെപ്പറ്റി ഒരു ധാരണ ഉണ്ടായിരിക്കില്ലെ ? കൂടാതെ ആ മീൻകറി ഉണ്ടാക്കൽ എന്ന പ്രക്രിയ ഒരു ക്രാഫ്റ്റ് അല്ലെ ? മീൻകറി യുടെ ഓരോ ചേരുവുകൾ ചേർക്കുമ്പോൾ അവസാനത്തെ റിസൾട്ട് മനസ്സിലുണ്ടാകില്ലെ ? ചൂട് വെള്ളത്തിലിട്ട പുളി , ഉപയോഗിക്കുന്ന മസാല. ( മസാല Market -ൽ ഇപ്പോൾ വിവിധ തരത്തിലുള്ള ബ്രാൻഡുകളിൽ കിട്ടും . ഓരോന്നിനും ഓരോ രുചി, ഓരോ ഗുണം ) പിന്നെ മസാല ചേർക്കുമ്പോൾ ഓരോന്നിന്റെയും സ്വഭാവം അറിയണം . മുളക് എരിവാണ് - അപ്പോൾ മുളകിനെ അറിഞ്ഞു ഇടണം . മഞ്ഞൾ അധികമായാൽ നിറവും രുചിയും മാറും. പിന്നെ മല്ലിപൊടി അതും പാകത്തിന് .
എന്താണ് ഈ പാകം ? അത് അവസാനത്തെ രുചിയുമായി ബന്ധപ്പെട്ടതല്ല ? ആരാണ് ആ രുചി ഉണ്ടാക്കിയത് ? അല്ലെങ്കിൽ അങ്ങനെ ഒരു രുചി ഉണ്ടോ ? അത് തികച്ചും ആപേക്ഷികമല്ലെ ? ഈ അറിഞ്ഞോ അറിയാതെയോ കിട്ടുന്ന ഇതു പോലെയുള്ള അറിവുകൾ പാചകക്കാരന് ഉണ്ടായിരിക്കണ്ടെ ?
ഇതു ഒരു പാചകക്കാരന്റെ കാര്യം മാത്രമല്ല എല്ലാ മേഖലയിലും അതാതു ജോലിയിൽ ആ പ്രത്യക ക്രാഫ്റ്റ് ലഭിച്ചവന് ആ ടച്ച് ഉണ്ടാവില്ലെ ? വെറും ടച്ച് എന്നല്ലാ പറയേണ്ടത്
" ദൈവത്തിന്റെ സ്പർശം " ( അവിശ്വാസികൾ പൊറുക്കുക . വേറെ വാക്കുകൾ എന്റെ കൈയിൽ സത്യമായിട്ടും ഇല്ല ).
ഒരു ഡ്രൈവർ - ദൈവത്തിന്റെ സ്പർശമുള്ളവൻ . അവന്റെ ജോലിയിൽ അവൻ ഒരു പ്രത്യകത കാണിക്കുന്നു . അവൻ സ്റ്റിയറിംഗ് പിടിക്കുന്നതിൽ , ആക്സിലേറ്റർ കൊടുക്കുന്നതിൽ , ബ്രേക്ക് ചവിട്ടുന്നതിൽ . ആ ഡ്രൈവറുടെ കൂടെ യാത്ര ചെയ്യുന്ന യാത്രക്കാരന് മറ്റു വണ്ടികളിൽ നിന്ന് ലഭിക്കാത്ത ഒരു യാത്രാ സുഖം ലഭിക്കുന്നു.
ഒരു ടീച്ചർ - പ്രയാസമേറിയ വിഷയം പോലും വളരെ ലളിതമായ രീതിയിൽ കുട്ടികൾക്ക് പറഞ്ഞു കൊടുക്കുവാൻ ആ ടീച്ചർക്ക് സാധിക്കുന്നു . ടീച്ചറുടെ പ്രത്യകത നിറഞ്ഞ ശൈലി , കുട്ടികളെ സ്വാധിനിക്കുന്നതിലെ മിടുക്ക് ഒക്കെ ടീച്ചർ ആ ടച്ച് കാണിക്കും . ആ ക്രാഫ്റ്റ് കിട്ടിയ ടീച്ചറെ കിട്ടുന്ന വിദ്യാർഥികൾ ഭാഗ്യവാന്മാരാണ് .
അങ്ങനെ എല്ലാ മേഖലയിലും ഉണ്ടാകില്ലെ ആ ടച്ച് ?
ഇതു പോലെ സിനിമയിലും ഒരു കഥ , അല്ലങ്കിൽ ഒരു സങ്കൽപം അവതരിപ്പിക്കപ്പെടേണ്ടി വരുമ്പോൾ ചില തിരഞ്ഞെടുപ്പുകൾ നടത്തേണ്ടി വരുന്നു. അതായതു കഥ പറയുന്ന പശ്ചാതലം , കഥാപാത്രങ്ങൾക്ക് ചേർന്ന അഭിനേതാക്കൾ , അവരുടെ വേഷങ്ങൾ , കഥാപാത്രങ്ങൾ ഉപയോഗിക്കേണ്ട ഭാഷ , സംഗീതം , ക്യാമറാ മൂവ്മെന്റ് , തുടങ്ങി നൂറിലും ആയിരത്തിലും ഒടുങ്ങാത്ത ചേരുവകൾ . അത് സംവിധായകൻ തന്റേതു മാത്രമായ രീതിയിൽ അനുപാതകത്തിനു ചേർക്കുമ്പോഴാണ് പുതിയ ഒരു സിനിമ ഉണ്ടാകുന്നത് . അല്ലെങ്കിൽ ആ സംവിധായകൻറെ " ടച്ച് ' അവിടെ ഉണ്ടാകുന്നത് .
(കാര്യങ്ങൾ പാകത്തിന് ചേർത്തില്ലാങ്കിലും ഒരു സിനിമ ഉണ്ടാകും, അത് മറ്റൊരു കാര്യം )
ഭരതൻ ടച്ച് എന്ന് പറഞ്ഞത് അതല്ലേ ? ഒരു ആർട്ട് ഡയറക്ടർ ആയിരുന്ന അദ്ദേഹം ചില ചേരുവകൾ , ചില തീരുമാനങ്ങൾ അതെല്ലാം കൂട്ടിക്കുഴച്ച് പച്ചയായ നാടൻ കഥകൾ പോലും അദ്ദേഹത്തിന് മാത്രം വശമായ കാവ്യാത്മകത യോടെ അവതരിപ്പിച്ചു. അതല്ലെ ഭരതൻ ടച്ച് ?
ഈ അടുത്ത്, ഒരു മലയാളം സിനിമ കണ്ടു . ചിത്രം കഴിഞ്ഞു അവസാനത്തെ ടൈറ്റിൽ " A Mahesh kumar film " എന്നെഴുതി കണ്ടു. ( Director -റുടെ പേര് fake ആണ്. അല്ലെങ്കിൽ അയാൾ എന്നെ കല്ലെറിഞ്ഞു കൊല്ലും ) . അതായതു ആ സിനിമ യിലെ എല്ലാ ചേരുവുകളും , പാകങ്ങളും അയാൾ കണ്ടു പിടിച്ചത് , അല്ലങ്കിൽ അയാൾ ഉണ്ടാക്കി എന്നാണ്. കഥ പറയുന്ന രീതി മുതൽ actors- ന്റെ വേഷങ്ങൾ വരെ നൂറൂകണക്കിനു അന്യ ഭാഷാ ചിത്രങ്ങൾ അനുകരിച്ചു എന്നരിക്കെ അയാൾക്ക് എങ്ങനെ അത് സ്വന്തം കണ്ടുപിടുത്തം എന്ന് അവകാശപ്പെടാൻ കഴിയും ?
മീൻകറി ഉണ്ടാക്കുന്നതിനുള്ള ചേരുവുകളുടെ അളവ് , പാചകകുറിപ്പിൽ വന്നത് പോലെ ചേർത്ത് മീൻ ഉണ്ടാക്കിയവന് , അവൻ ഉണ്ടാക്കിയ മീൻകറിയെപ്പറ്റി യാതൊരു ധാരണയും ഇല്ലാത്തവന് ഞാൻ ഈ പാചകക്കുറിപ്പ് നോക്കി ഉണ്ടാക്കിയതെന്ന് പറയാൻ കഴിയും . അല്ലാതെ ഞാനുണ്ടാക്കിയ പ്രത്യക രുചിയുള്ള മീൻകറി എന്ന് പറഞ്ഞാൽ ചട്ടിയിൽ കിടക്കുന്ന മീൻ വരെ കമിഴ്ന്നു കിടന്നു ചിരിക്കും.
ഞാനുണ്ടാക്കിയ മീൻകറി എന്ന് പറയുന്നതും , എന്റെ മീൻകറി എന്ന് പറയുന്നതിലും പ്രകടമായ വ്യത്യാസമില്ലെ ?
സത്യത്തിൽ അങ്ങനെ പ്രത്യക രുചിയുള്ള , ഗുണമുള്ള , സ്വഭാവുമുള്ള,
ആഢ്യത്തമുള്ള മീൻകറി കഴിച്ചാൽ നമ്മൾ പെട്ടന്ന് മറക്കുമോ ? അത് പോലെയല്ലേ സിനിമയും , സംവിധായകന്റെ മാന്ത്രിക സ്പർശമുള്ള ഏതു സിനിമയാണ് നമ്മുടെ മനസ്സിൽ നിന്ന് മാഞ്ഞു പോയിട്ടുള്ളത് ?
അങ്ങനെ പറയുകയാണെങ്കിൽ എത്ര സംവിധായകർക്ക് ആ മാന്ത്രിക സ്പർശം / ക്രാഫ്റ്റ് / ആ ടച്ച് / കിട്ടിയിട്ടുണ്ട് ?.........ചുമ്മാ ഓരോ ചോദ്യങ്ങളാണെ ?
................................ ................................... .............................
